Awag ti Kinaagdama

Iti panangsapsapulkot’ kaimudingan

Ken kinasiasinok iti daytoy a biag

Naimayengak a nangan-anninaw

Kadagiti nalipatanen a dana

Nga iti naminsan nagnagnaak

Nangted liwliwa ken ragsak kaunggak.

Iti garbo dagiti sabsabong a naimatangak

Nalipatak payen kinapudno ti agdama

Ket nakipagbiagak kadagiti naikupinen a napalabas

Ngem adda maysa a naidumduma nga awag

Nangriing kaniak iti kaltaang ti pannakailibay

Ket inyarasaasna nga awan banagek nga agbibiag

No agbiagak iti anniwan ti naglabas.

Timmangadak iti naarkusan kadagiti bituen

A tangatang ket pinerrengnak ti nakaisem a bulan

Minurmurayannak ti palayupoy ti kinapudno

A nasaysayaat a nanamekon sam-it kinaagdama

Ta adda Mannakabalin a kired ken bagnos

A mangranraniag dalan nga agturong

Iti nasin-aw a masakbayan.

Wen, anninawakto latta ti bubon ti napalabas

Ngem saanakton nga agnaed iti salinongna.

Bubon ti Napalabas

Luktak ti nabayagen a narikpan a bubon ti kalman

Ket ayamuomek ti naullom a sang-aw nalipatanen a bigat

Tan-awak ti nalit-aw a danum ti nalukiben a pinanid

Ket napnuan gagar a tawingek ti nalikudak a panawen

Tapno idigosko iti mawaw unayen ken lagip a derrep.

Ta no kabalinak koma a sukiren

Ti pannagna ti oras ken panawen

Ket pagbannawagek ti init iti bandat’ laud

Tipdek komat’ pannakabilang dagiti tawen;

Ngem aggunay dagiti bigat ken malem

Aglabas dagiti aldaw ken rabii

Ket kas danum ti agus ti panawen

Ket dinto kabalinan a pengdan

A lumned iti barukong ni Apo Daga

Ket sam-it dagiti pasamak ti naglabas

Matawingto laengen iti bubon ti napalabas.

Wen, no kabalinak laeng koma nga igalot

Pannagnat' napardas nga oras ken kanito

Ket pagtalinaedek lattan dagiti imbag ken ragsak

Ngem dumteng met lattat’ danum ti kinapudno

Ket paggunayenna lattat’ ayus ti panawen

Ket di maigawid ti idadateng manen

Sabali a tawen a mangkitikit kinatao

Ket diakton kabaelan pay nga isublit’ kinaubing

No di ket anninawakto lattan iti bubon ti napalabas.

_____________

Dedicated to my Brothers Joe and Jhun(Bong), Sisters Adeline and Bhena & to myself.

________________

Getting older is a fact that anyone can never deny. It's so sad to think that I can't bring back the good old days anymore. Just remembering is all I can do. Happy birthday to me in advance!!!

Kenka Dayag ti Hustisya

Kabulon ti puyat, lua, ken sakripisyo
Ti napasnek a kararag nga awan sardayna
Ti puonak tapno innak laeng masirayan
Silap dagiti kampilan ti linteg nga iggem
Ti nasidap a makannawan nga imam;
Ket di mabilang a dangadang linasatko
Maipaneknekko laeng kenkat’ siglat
Tadem ti kampilan met nga armasko
Tapno awatennak nga adipen iti armadam.

Inusarkon ared-ed ti kabaelan ken pigsa
Nagtedteden ti natda a ling-et ken dara
Malasatko laeng desdes a naunday ken nasamek
Agturong kalkalikagumak unay a sadiam
Ket makipagbiagak pagtimbangan ti Hustisya
A petpet ti napudno a kannigid nga imam.

Wen, Dayag ti Hustisya adtoyak kenka nga agruknoy
Ket sapay ta matmatannak kad’ kadagita naabungotan a matam.
________
Dedicated to all the Barristers taking the 2008 Bar Examinations at De La Salle University, Manila, Philippines, trying their luck and chance into the world of Law Profession.

________

Image courtesy of http://www.sccollege.edu