Aglumoten ti singgalot
Nangbegkes ayan-ayat
Nga uray kasano kapigsat' apres
Ti ayus ti karayan ti biag
Ket saanyo intulok a mapugsat,
ketdi lallalo pay a pinakidser nepnep ti lua
Ken pudot iti kalgaw ti rigat
Nga inkayo nagbuligan.
Awan sardayna a pannaripato
Ti inpaayyo iti belo a nangbalkot
Pinagmaymaysa puso ken riknayo
Ta uray no dadduma adda man umapay
A sagursor wenno puris a mangdadael
Simbeng ken linay ti panagdennayo
Ngem diyo intulok a marakrak -
Mapisang iti uray kasano kadawel
Nga aplaw ti kapigsaan a bagyo.
Wen, main-inuten nga agregregreg
Dagiti masagsaginnit nga aggango
A bulbulongyo ngem agsaringit latta
Ti sarantat’ kaungganyo a mangbuybuya
Kadagiti nalalangto ken lumanglangto pay
A saringit a nagdaludal manipud sakloloyo.
Angaw kadi pay aya ti nagdaliasatan
Ti kagudua dekada a panagdennayo?
Marukod kad’ pay dagiti lingling-et ken lulua
Rimsua panangtagibenyo ti karin-kari
Inmaldityo iti maysa ken maysa
A taripatuenyo ti maysa ken maysa
Iti rigat ken nam-ay
Sanguanan ti altar ti Apo a Namarsua
Singkuenta a tawenen ti napalabas?
Dawatmi lang a saringityo
At-atiddog pay a biag, kired ken salun-at
Tapno dakami pay ti maatibayyo
Ken kadakayo maipaaymi met ti ayat-pannagibi
A sinagrapmi bayat panagubingmi
Nga inkayo kaniami panangmuli
Tapno madanunmi ti ita pagtaktakderanmi.
Adu a lua ti inkay inbubos
Tapno dakami ti mapadakkelyo
Ngem ala sapay ta naragsakkayon
A makakitkita nagbanbanaganmi nga annakyo
Agraman kaingungotmi ken appoko
(malaksid kaniak, hehehe).
____________________________________________________
*Nasapa a sagut a daniw kada Tatang ken Nanang para iti pannakaselebrar ti maika-50 nga anibersaryo ti panaglantip dagiti puspusoda inton Abril 21, 2011.
