Rosaska iti Agnanayun

Kas panagsulbod dagiti mulmula ken sabsabong
Idi dimmatengka idi tiempot’ panagsulbod (Spring)
Nagrusingka manen kadagiti imatangko
Ket isem kadagiti bibigko pinagbukarmo manen
Ket agingga ita ta petalo ken bulbulong ti agtinnagen (Fall)
Nakalanglangto pay laeng lagipkot’ isemmo.

Kayatko nga agnanayon a mabuybuyak
Dagiti isemmo a murmuraykot’ bigbigat
Ngem ti panagbaliw ti panawen ken tiempo
Ket saan a kabalinan dagiti binatogko
A pengdan panangyagos kenkat’ panawen
Ket matdaakto nga agur-uray manen idadatengmo.

Diak ammo no isemmot’ maimatangakto pay
Inton agtunaw manen dagiti niebe (Snow)
Ngem mangnamnamaak nga inton sumaruno
Nga agrusing manen dagiti sabong ken bulbulong
Addakanto manen a sarungkarak iti bigat a makariingak
Ket punasemto liday a kinabuligkot' bayat kaawanmo.

Wen, Rosaska a nangkayaw kaniak idi panagsusulbod

Ket agtalinaedkanto a Rosasko iti ana man a tiempo ken panawen.
________________________

To the Rose of Spring...

Saranayendak

Pul-oy,
Iliwko idiay balay

Yanginmo man

Tapno lua ken gagarko

Maikkat a maminpinsan.

Ta no saan koma

A dungngot’ inpananamda kaniak

Nalaka laeng komat manglipat

Ta awan koman segga ken iliw

Nga ita luluaak.

Apo Init,

Ikuyogmo man ala

Iti inka ilelennek

Iti pungto ti baybay

Dagitoy lua ken seggak

Tapnu siakon tay sinaandan.

Ta sutil met ngamin

Ni kabus a Bulan

Ta ipalagipna laeng

Lagip sardam a kaaddak

Sidong ti pamilyak

Nga ita sangsangitak.

Ay, bituen!

Riknak man ketdit' ay-aywem

Ep-epem man sanaang

Ditoy pusok umukuok

Tapno mailiwliwagko

Iliw a nairot.

Ta nagrigat ngamin

A riknaen ti kastoy,

No mapadasam la koma

Ti umadayo ken tangatang

Ket mariknam met

Kasasaadko ita.

Wen, ta naulpit ti lipat

Di la sumangbayen.

Ngem bituen no mariknamto

Ti riknat’ maiyadayo,

Umaykanto ditoy sidongko

Ta duatanto ti aginnay-ayo.

_______
Far away...crazily missing home...tears flowing down from your eyes.

A poem that was written while I was far away from home for my Bar Examination Review last September 2006 in the City of Manila, Philippines.

Agayatak Kenka Samtoy

Kasla am-ammangaw dagiti kanito
A makilanglangka iti nasutil a pluma
Ta awan sabali a maaramidan no di agkur-it
Iti masansan awan kaes-eskanna a kapanunotan
A dagullitento manen a mulenglengan-imutektekan
Ket sumaren ken padasemto latta nga abelen
Dagiti agsasallupang ken di maaw-awatan a balikas
Nga agburburayok iti maul-ulaw a muging.

Masansan masarakam ti bagim a mangsipsipot
Kadagiti banag a di mailadawan ti nasimbeng
A panunot; dumdumngeg iti deppaas ti angin
Ket tunggal tukodem nga amirisen ti isawsawangna
Ket agtunglabka a mangdanun kaipapanan
Ti wagis dagiti bulbulong nga ar-arasaasan ti palayupoy;
Ket no mabalin ket agsublikan iti simbeng
Ti panunot; ngem tunggal gay-atam ti tumakdang
Ket alupennakanto manen ti plumam
Ket agdanggaykayto manen nga agsala
Tapno imutektekanyo dagiti liriko a nakakur-it
Iti musika nga idaydayyeng ti angin.

Wen, narikut a nasam-it ti makipagbiag iti salonan ni Samtoy
Ngem adda itdenna a ragsak ti kaunggan ken simbeng ti panunot.

_____

Originally posted at www.iluko.com last August 10, 2008.

Gumawgawawa Ken Ayat

Dagiti binatogmo a pasig a parparato

A parparaipusan isemmo a mangyaw-awan

Buriburennat’ tagainep a nangbalud

Agmalmalatimat a masakbayan iti saklot panagtuok.

Iti payapay ken pakada ti palayupoy

Naimaldit binatog ni pakaasi ken unnoy

Saning-i a gumawgawawat’ dungngo ken duoy
A kabulignat’ ayug – panagsagaba nga agruknoy.

Iti baet dagiti dalluyon, ti init agpakpakada
Ket ammok, ti ayug duayyaan panagsagaba

In-inut inna lemmessen, inna idan itanem

Ket iti bannawag baro nga agsapa inna idateng.

_____

-this poem was first published at THE WILLIAMITE, The Official Student Publication of Divine Word College of Laoag, Laoag City on its October 2001 Issue and posted at http://www.iluko.com/ last December 6, 2006. Unfortunately, it was copied by Alex Vicente Yadao without the author's permission and posted at http://www.iluko.com/ today (August 22, 2008).

_____

This is the poem that was copied and posted by Mr. Alex Vicente Yadao:

_____

Panagsagaba nga agruknoy

_____

Arpad dagiti imnas ni karayo

mangpabang-ar rikna nga agmamayo

nangtubay ayog ti aglawlawko

mangitulod linglingay, nasudi nga ayatko.

_____

Dagiti pasig a parparato

dagiti mangyaw-awan nga isemmo

buriburenna ti tagainep a nangbalud toy puso

masakbayan ti saklot panagtuok dita sidongmo.

_____

Iti payapay ken pakada ti palayupoy

naimaldit binatog ti pakaasi ken unnoy

Saning-i a gumawgawawa dungngo ken duoy

a kabuligna't ayog panagsagaba nga agruknoy.

_____

Baet dagiti dalluyon,sipngit ti agpakpakada

gumgumluong nga ayog ti panagsagaba

In-inut inna lemmessen amin ida

ket agbannawag ti baro nga agsapa.

_________________________________

What he did is a plagiarism. This is against the "Intellectual Property Law".

Daklis ti Agdadamo a Mannurat

Isalogko maminsan pay iti tallaong

Daklis ti agdadamo a mannurat;

Gaudak biray ti plumak

Ket tarakek sinaludan a balikas.

Timunak ti bilog ti kinataok

Ket aglayagak iti mangliweng-liweng

A taaw da Saluyot ken Samtoy

A pangsaklawak pangen dagiti binatog.

Ta uray napigsa man aluyo ti dalluyon

Ti paay ken umsi a mangsabuag-mangpalned;

Gaudakto lattat’ plumak a mangsarakusok

Ket isangladko ti kinuribot-binubo nga obra.

Wen, isudat’ mangtubay kaniak nga agbalin a nakired

A mangngalap babaen iti pluma ni nanumo a mannurat.

Ayamuom ti Naglabas

Pengdak koma nga ibugasan

Dagiti naglaon ken tignay

Ngem unnoy met ti iyibit ti rikna,

Ta di malibak a nasair manen

Ngalay ti kaunggan.

Wen… ta ti pannakasay-opko manen

Iti ayamuom nga iti naminsan

Nangted rag-o ditoy pusok

Ket mariknak a sumuknor manen ni essem

Ket kuriruenna laeng simbeng panunotko.

Ngem sukiren met ti kinapudno

Ket ipalagipna laeng ti kinaagdama.

Ta ti pegges ti darikmat

Ket pilitenna a yagus ni kalikagum

Ket diakon matukod a panunuten

No dinnod’toy ayankon a disso.

Addaak pay kadi dati a pagtaktakderak

Wenno nagsubliak iti linipatkon a naglabas?

Disso ni Naglabas

Rugiak manen nga iyaddang

Agsarsarimaddeng a dapan

Ket padasek a daliasaten manen

Nawatiwat - nasamek daladal ni naglabas.

Wen, tontonek iti maminsan pay

Lugar ni ayat nga dati nagtaengak

Nakaitallimengan nalalangto a sabsabong

Nga iti naminsan nangkayaw kaunggak

Nangted ragsak agmalmalatimat nga ayat.

Sublianak a sangbayan

Taeng naubing a puso

Disso nga naaladan ken pateg

Paraangan da ilala ken dungngo,

Tapno lipatek kinapudno ni agdama

Ket agnaedak manen ken naglabas

Iti sidong natarnaw-nalangto

A minuyongan ni kalman.

Reflections of Me

Calgary, Alberta, CA

Trying to communicate with the lovely moon.

Soft - yet not yielding; Firm - yet not hard...that's the true gung fu man...(Bruce Lee)

Fly like a bird...settle down like a withered leaf.

Welcome!

Come join me in my simple lonely world of poetry and photography trying to express the unspoken words and to capture the unseen.

I fell in love with photography because when I held my camera i begin to see things like what Lee Frost once told that other people miss because they are blinded by familiarity.

On the other hand, I was sucked into the vortex of the swirling world of poetry holding my pen thinking that I can make the whole world think with the drop of my bloody ink.

Poetry and Photography are however intertwined to each other. POEM can depict the most beautiful picture and a PICTURE can paint a thousand words.

Let's then paint a canvass of poetry and photography!