Limeriko para kenka Uliteg

1.
Lagidawek unay uliteg ti inpapetpetmo a dapo
Ken pinangperresmo lulonan toy ulo;
Ta gandatmo idi mayanakak kanu a tagibi
Ton dumakkelak naamonto kaniak lames ken babbai,
Ngem kitaem ita banag toy kaanakam a tarantado.

2.
No agpaypayso man ti inuugma a pammatim
Adda yamanko ngem adda met innak kenka panagalumiim
Ta apay ngamin a kastoy kalokoan nga inaramidmo?
Tatta siakon ti linipat da Tatang ken Nanangko.
Talekda kaniak isu pay ngatat’ maisublim?

3.
Uliteg saan laeng a dayta ti kenka pilawek
Ta pati arak siak ti sinuruam nga inwawek;
Kunam idi ubingak a saan a dakes ti uminom
Turongna la ketdi tiyan saan a dita ulom,
Ngem ita kitaem banagko ngipenkon ti natumek.

4.
Lipatenka koma metten nga uliteg
Ngem ay-ayatenka met a kas panagayatda kadaytoy lateg;
Ngem ala ammok saan pay naladaw ti amin,
Ngem tandaanam no rumuarto apokom ken ni kasinsin
Perres ken dapo isunto met aramidek.

*LIMERIKO wenno LIMERICK iti sarita nga Ingles ket maysa a kita ti daniw nga addaan iti lima linya a rukod a pinasikat ti mannurat wenno ilustrador a ni Edward Lear a nagbiag iti baetan ti tawen 1812 ken 1888. Agka-rhyme ti maudi a balikas ti dua nga umuna a linya, kasta met ti maikatlo ken maikapat, ken ti maudi a linya ket umarngi iti umuna ken maikadua wenno AABBA. Kangrunaan a panggep wenno tema daytoy a daniw ket makapakatawa wenno makapaisem. -[http://en.wikipedia.org/wiki/Limerick_(poetry)]

Dios kenkat' kumuyog (pammakada ken panagyaman kenka grace)

Lunagen pammakada kilnet puso
Ket agsapri ti lua iti sagumaymay ti biagko
Gaput’ pannakawarwar tunggalit’ karinkari
Pinaglantip ayan-ayatta
A kasla idi awan patinggana.

Itan mapisangen ti belo
A nangsallukob nagmaymaysa a pusota
Mapugsat itan ti kuerdas
A namagsilpo kadagiti angesta
Nagkuykuyog a kimmalkalay-at iti alimpatok ti ayat.

Bay-anta ngarud a dagiti lua
Depdependan ti apoy
A nangted silaw ken bara
Kadagiti napnuan sipnget a rabii
A nagmaymaysata.

Itedko kenkan ti pammalubos
Tapno nawayakan nga agpasag iti sabali
Ket saanko ketdi a degdegan pay dagensenmo.
Ta no kasanot’ kinadugos nga iturong ti ayat
Ket kastat’ karigat met nga iwaksit’ maysa ken maysa.

Pagyamanak ti ayat ken dungngom
Nga uray puro apges ken saem ti inpapaayko
Ket puro ayat pay laeng ti inka insubsubad.
Tagikuaenka koma ngem ammok saankan a naragsak
Ta ammok awan karbengak tapno ipagelko kenka dayta a banag.

Diakto pulos malipatan awan kapadana nga ayatmo
Ket kail-iliwkonto unay dagiti napnuan ayat a kinatangsitmo.

Ikkannak ti kired ken tured (tapno umadayoak kenka grace)

Sul-oyen lattat’ ladingit
Dagiti nabatbati a ragsak
Ket sagrapek lattat' saem
Itden limdo dagiti pasamak.

Diak ammo no kabaelak pay
Umaddang tapno rugiak manen ti magna
Ta agtigerger dagiti tumengko
Malmesak kadagiti agarimaya a lulua.

Wen, ta umapay latta ti apges
Tunggal rugiak ti umadayo
Lapunosenna agintutured a ragsak
Guyodennat' imatang tapno tumaliawak latta kenka.

Ana kad ti rumbeng nga aramidek?
Bay-ankan kunak ngem maruros met ti pasnek
Tunggal gay-atek ti umaddang ket agaruyot ti lua
Malmes ti tured tapno surotek ti yar-arasaas ti panunot.

Wen, ta inyegmo dagiti naririmat a bituen
A nangsilnag iti nasipnget a lubongko
Pinatibkernak ti ayat, dungngo ken pannaripatom
Pinabilegnak tapno yaddangko manen dagiti dapan.

Ita linikmutnakon ti kapoy ken buteng
Narukopen dagiti kired ken tured nga inyegmo.
Ta kinibinnak idi tapno duata ti umaddang
Ngem ita solokon ti umaddang tapno umadayo kenka.

Siak ken ti Baro nga Agsapa

Gagemko unay iti agawiden Claveria

Agsubli Oh, lugar a timmanuran ken nakayanakan

Ngem piman maikariak pay ngata nga agsubli kenka?

Ta ti kinapudnona saanen a siak daydi dati a siak.

Wen, kailiwko daydi dati a siak

Ngem saan a ti dati a kayatmo a pagbalinak

Ta saanen a siak daydi dati a siak

Ngem siakon ti nangmulian ti panawen kaniak.

Awatennak kadi a Claveria

Ta dagiti banbanag ket saanen a kas iti dati

Adun ti namalbaliwan ti amin

Nagluposen daydi dati a patanormo.

Kas iti kinaagdama, inton sumuno nga aldaw saanen nga ita

Ngem ketdi maysan a naglabas a kalman.

Baro nga agsapa ngem sabalin a bigat

Kas kaniak, saanakon a kas iti dati – daydi dati a siak ket paseten ti napalabasko.

Ti kinaagpayso ket saanen a siak daydi kayatmo a pagbalinak.

Ngem maawatmo kad’ pay ti kinasiasinok ita nga agdama?

Yester-ME

I always want to go back home

Home where I always long to be.

But I can’t take the usual me with me

For I am not anymore the man I used to be.

Yes, I miss the man I was that I used to be

But not the man I can’t be that they expect me to be.

I am not anymore the man who you wanted me to be

But I am now what time made me.

Please accept me for being me now

Because things weren’t like they were before anymore.

Just like today, it won’t anymore be today tomorrow

But it will be yesterday.

Tomorrow is another day but not the same as today.

Just like me, the usual me is not me anymore me – it’s yester-ME.

The truth is - I’m not anymore who you wanted me to be.

Can you still accept me for being me?