Ikkannak ti kired ken tured (tapno umadayoak kenka grace)

Sul-oyen lattat’ ladingit
Dagiti nabatbati a ragsak
Ket sagrapek lattat' saem
Itden limdo dagiti pasamak.

Diak ammo no kabaelak pay
Umaddang tapno rugiak manen ti magna
Ta agtigerger dagiti tumengko
Malmesak kadagiti agarimaya a lulua.

Wen, ta umapay latta ti apges
Tunggal rugiak ti umadayo
Lapunosenna agintutured a ragsak
Guyodennat' imatang tapno tumaliawak latta kenka.

Ana kad ti rumbeng nga aramidek?
Bay-ankan kunak ngem maruros met ti pasnek
Tunggal gay-atek ti umaddang ket agaruyot ti lua
Malmes ti tured tapno surotek ti yar-arasaas ti panunot.

Wen, ta inyegmo dagiti naririmat a bituen
A nangsilnag iti nasipnget a lubongko
Pinatibkernak ti ayat, dungngo ken pannaripatom
Pinabilegnak tapno yaddangko manen dagiti dapan.

Ita linikmutnakon ti kapoy ken buteng
Narukopen dagiti kired ken tured nga inyegmo.
Ta kinibinnak idi tapno duata ti umaddang
Ngem ita solokon ti umaddang tapno umadayo kenka.