Sika -
...a nangidayyeng ti umuna a nota ti musika ti biagko;
...a namunganayan ti bersikulo dagiti dandaniwko;
...a nangted tadem iti di agsarday pannakaasana a plumak;
...a nangitunda kaniak tapno denggek balikas ti angin;
...a nangisuro kaniak tapno anglabek ti palayupoy ti aglawlaw;
...a nangilili kaniak iti yuyeng ti narnekan a turog;
...a namagrusing iti naganus a panunot dagiti bin-i ni arapaap;
...a nangted namnama iti manglanglangeben a tangatang;
...a nangibirrayon kaniak iti rawis ti masakbayan;
...a nangpalukay kadagiti et-et dagiti parikut;
...a nangatibay kaniak bayat idadaliasat iti akikid a tambak ti biag;
...a namaglitem kadagiti petalo ti lusyaw a rosasko;
...a nangbisbisibis tapno lumangto ti maganggangon a kinataok;
...a nangmurmuray kadagiti matak tapno matmatakon ti masakbayan...
- KABLAAWANKAYO.
- KABLAAWANKAYO.
Ta no kas kalaka la koma ti umanges
Ti agsubli iti napalabas a panagubing
Ket pulos a diakon kayat ti umaddang pay
Tapno agsubliak iti narikut unay nga agdama
Ta kayatko addaak latta iti saklotmo
Nga agsangsanggir iti nakatagibiak a barukongmo
Tapno paturogennak latta kadagiti indakdakkelko a kansyonmo
Bayat panangililim kaniak tapno mayindayonak ken libay.
Naragsak a panagkasangaymo Inangko
Agyamanak iti daytoy sagut a biag
No man rigat la ti biag ti pagpaspasaran
Di mailadawan ragsakko ta nasalun-atka
Ken addaka latta a mangtartarabay kaniak
Iti laksid dagiti nabinggasan lamuyot a bugkawko
Ken awanan unay unget ken gubsang a karitko.
***iloveyousomuch Inangko
No comments:
Post a Comment