Sindiak ti kimmandela
A balikas ti kinasiasinok
Silawak ti nasipnget
A dalan agturong masakbayak
Babaen raniag dagiti binatog
Agaon manipud naakkuban
Dakulap nga apoy; saripda
Iti pul-oy ti umsi ken uyaw
A pilit a mangdepdep
Nagangtan a kalikagum
Nga agraniag manipud kasipngetan.
Ket sakbay a marunot
Ti kandela a sinindiak
Ket likmuten manen ti sipnget
Ti aranaar nga inyegko
Sapay ta adda sabali a maaranaaran
Ket agserbi ti plumak
A silaw a mangiturong
Nalinteg a dalan ti biag.
Wen, agserbi met ti daniw
A kandela ti biag.
No comments:
Post a Comment